Феминизм

Жоқ, бұл «ерлерге қарсы қозғалыс емес». Бұл — әйелдер құқығын қорғауға бағытталған, оларды жынысына бола кемсітуге қарсы саяси қозғалыс.

Феминизмді атақты публицист Мэри Шир былай түсіндіреді: «Феминизм — әйелді адам деп есептейтін радикал көзқарас».

Сайлау, білім алу, жұмыс істеу, жылжымайтын мүлік пен жоғары лауазымға ие болу, болашақ жарын өзі таңдау не мүлдем некелеспеу құқығы — мұның бәрі әйел құқығы үшін күрестің нәтижесі.

Феминистер бір ғасырдан астам уақытта көп нәрсеге қол жеткізді. Дегенмен әйелді алалаумен әлі күнге дейін күресіп келеді. Мысалы, тұрмыстағы зорлыққа, жыныстық зорлық-зомбылыққа, объективацияға, жалақының тең төленбеуіне мен әйелдердің саясат пен бизнеске араластырылмауына қарсы шығады.

Феминизмнің бірнеше түрі бар: либерал, интерсекционал, марксист, радикал және тағы басқа. Бірақ мұндай айырмашылықтарға қарамастан, барлық феминист «әйел — құқықтары қорғалуға тиіс адам» деген оймен келіседі.

Бұл қозғалыстың басты мақсаттарының бірі — әр әйелдің өз жолын өзі таңдап, қалауынша өмір сүре алуына жағдай жасау. Ол үй шаруасындағы адам ба, кәсіпкер ме, баласыз я көпбалалы ма, маңызды емес. Бастысы — бұл оның таңдауы болсын.