Қазақстандық дипломаттар құзырлы мемлекеттік органдармен бірлесіп, Таяу Шығыстан азаматтарымызды қайтару жұмыстарын жалғастырып жатыр.

СІМ мәліметінше, эвакуация басталғалы бері резидент және резидент емес әуе компанияларының қолдауымен 7300-ден астам қазақстандық елге қайтарылды.

 «Әуе рейстерінен бөлек, азаматтарды эвакуациялау Әзербайжан, Армения және Түрікменстанның құрлықтағы мемлекеттік шекаралары арқылы да жүзеге асырылып жатыр. Өңірдегі Қазақстанның дипломатиялық өкілдіктері жергілікті жерде іс-қимылдарды үйлестіру жұмыстарын жалғастырып, отандастарымызбен тұрақты байланыста», - делінген хабарламада.

Осыған дейін наурыздың 7-нен 8-не қараған түні Таяу Шығыстан елге 1 786 жолаушы жеткізілгені туралы хабарланған.

Айта кетейік, бұдан бұрын ресейлік туристер қазақстандықтарды Таяу Шығыстан эвакуациялау жұмыстарының жүйелілігі мен жылдамдығына таңданыстарын білдірген.

Сондай-ақ, Masa media редакциясы Парсы шығанағы елдеріндегі мазасыздық Қазақстан азаматтарының отаншылдық сезіміне қалай әсер еткені жайлы жазған.