Шетелдіктер қазақстандық үш баланы елден заңсыз әкетпек болған
Былтыр Қазақстанда адам саудасына қатысты 164 қылмыс тіркелген.
09:18
66
0
Бір жыл ішінде елімізде адам саудасының 171 құрбанына әлеуметтік қызметтер көрсетілген. Бұл туралы Адам саудасына қарсы іс-қимыл жөніндегі ведомствоаралық комиссия отырысында Еңбек және халықты әлеуметтік қорғау министрлігінде өткен министр Асқарбек Ертаев мәлімдеді.
Оның мәліметінше, былтыр Қазақстанда саудаға түскен 94 ер адам, 52 әйел және 25 балаға және 93 шетелдікке уақытша баспана, медициналық және психологиялық көмек, сондай-ақ жұмысқа орналасуға және құжаттарды қалпына келтіруге жәрдем көрсетілген.
«ҚР ІІМ деректері бойынша, 2025 жылы адам саудасына қатысты 164 қылмыс тіркелген. «STOP трафик» операциясы аясында рейдтердің 4 кезеңі өткізілді. ҰҚК Шекара қызметі заңсыз көші-қонның 29 арнасының жолын кесті, ал Астана мен Алматы халықаралық әуежайларында шетелдік азаматтардың үш кәмелетке толмаған қазақстандықты заңсыз алып кетуіне жол берілмеді», – деді Ертаев.
Ведомство басшысы әрбір құрбанның тағдырын қадағалау және келетін адамдарға мониторинг жүргізу үшін мемлекеттік органдардың ақпараттық жүйелерін толық цифрландыру және интеграциялау қажеттігін айтты. Сондай-ақ инфрақұрылымды дамыту мәселесін көтерді: әкімдіктерге өңірлерде дағдарыс орталықтарын құру мен жабдықтауды бақылауға алу тапсырылды.
Министрдің пікірінше, кәмелетке толмаған азаматтарды шетелге (оның ішінде суррогат ана болу шеңберінде) алып кету әрекеттеріне байланысты тәуекелдерді егжей-тегжейлі талқылау қажет және қажет болған жағдайда заңнамаға қатаң түзетулер енгізілуі тиіс.
Facebook
Twitter
Vkontakte
Telegram
Whatsapp
Пікірлер жоқ.