Жаңа жүйе қашан енгізіледі?

Жаңа  талап Еуразиялық экономикалық одаққа мүше елдердің азаматтарына да қатысты болады. Яғни визасыз режиммен Қазақстанға келетін барлық шетелдік жаңа тәртіпті сақтауы керек.

Жаңа платформаны толық іске қосуға дейін өтпелі кезең қарастырылған. Ол 2026 жылғы 1 қарашада басталады.

Алғашқы кезеңде жүйе Ақтау әуежайында және шекарадағы төрт автомобиль өткізу бекетінде сынақтан өтеді. 2027 жылғы қаңтардан бастап жүйеге Астана мен Алматы әуежайлары қосылады. Наурыздан бастап жаңа тәртіп қалған барлық шекара бекетінде қолданылады.

2027 жылғы 30 маусымға дейін электронды рұқсат алу ұсыныс ретінде ғана енгізіледі. Ал 1 шілдеден бастап цифрлық құжат шекарадан өту үшін міндетті болады.

Электронды рұқсатты қалай алуға болады?

Өтінімді арнайы QazETA мобильді қосымшасы арқылы сапарға дейін кемінде 72 сағат бұрын беру қажет. Рұқсат алу тегін, ал берілген құжат алты ай бойы жарамды болады.

Кімдерге рұқсат алудың қажеті жоқ?

Мемлекет жаңа талаптан азаматтардың шектеулі санатын босатқан. Олардың қатарына:

• 16 жасқа толмаған балалар;
• 65 жастан асқан зейнеткерлер;
• Қазақстанда тұруға ықтиярхаты немесе жұмыс істеуге рұқсаты бар шетелдіктер;
• дипломаттар;
• транзитпен өтетін жолаушылар;
• халықаралық жүк көліктері мен автобустардың жүргізушілері кіреді.

Фото: actgr.kz.