Фото: vpnoverview.com

Түрікмен ұлттық қауіпсіздігі қызметі интернеті бар азаматтарын VPN-нен бас тартқызып, Құранмен ант беруге мәжбүрлеп жатыр. Мұны «Азаттық радиосының» түрікмен қызметі хабарлайды.

— Былтыр үйіме интернет қондырам деп кезекке тұрғанмын. Кезегім бір жарым жылдан кейін келді. Оның алдында Wi-Fi қосу үшін көптеген құжатқа қол қойдым. Ал енді VPN қолданбаймын деп Құранмен ант беруге мәжбүрмін. Онсыз сайттар ашылмайды ғой. Тіпті не істерімді білмеймін, — деген жергілікті тұрғын редакцияға. 

Түрікменстан билігі VPN қолданатын азаматтарын қудалап отырады: айыппұл салады, жауап алуға шақырады. Десе де, елде бұл қосымшаға жүгінетін адамдар көбейіп жатыр. «Азатлық» оны билікте отырғандар да қолданады дейді.