Фото: zn.com

Франция парламентінің жоғарғы палатасы — Сенат — Таулы Қарабақ Республикасына (ТҚР) қатысты резолюция шығарды. Онда сенаторлар ел үкіметін ТҚР тәуелсіздігін мойындауға үндеді. Мұны РБК хабарлады. 

Сонымен бірге құжатта депутаттар: 

• Әзербайжанның «қарулы агрессиясын» сынайтынын; 
• Таулы Қарабақтың бейбіт халқына гуманитар көмек жолдау қажетін;
• аймақта жасалған қылмыстарды халықаралық деңгейде тексеру қажетін айтады. 

Армения премьер-министрі Никол Пашинян бұл шешімнің «тарихи маңызы бар» десе, Әзербайжан билігі резолюцияны «жай ғана бір парақ» деп атаған.

Ал Францияның Сыртқы істер министрлігі «Таулы Қарабақ Республикасын бір жақты мойындау ешкімге — Францияға да, Арменияға да, Қарабақ халқына да, Еуропаға да  — пайда бермейді» деп пікір айтты.

Таулы Қарабақтағы Армения-Әзербайжан шиеленісі 1990-жылдардан бері жалғасып келеді. Ең кейінгі үлкен қақтығыс 27 қыркүйекте басталып, 9 қарашада үшжақты (Ресей де қол қойды) келісіммен бітті. Ол келісім бойынша екі ел арасындағы атыс бітіп, Таулы Қарабақтың бірнеше бөлігі Әзербайжан құрамына өтеді. Бұл қақтығыс туралы мына жерден толығырақ оқыңыз.