Біз бұған дейін халықаралық әйелдер күні қалай пайда болғанын, оның көктем, махаббат және нәзіктік мерекесі емес екені  туралы жазғанбыз. Бүгін 8 наурызда айтылатын стандартты құттықтаулар туралы айтамыз. 

Нәзік әрі мейірімді болу

Қате: «Мейірімді, нәзік, төзімді бол!» дегеннің барлығы әйел адам қандай болу қажет деген стереотиптер жиынтығы. Нақтырақ айтқанда, қоғам көргісі келетін әйел бейнесі. 

Дұрыс: Өзіңе және өз күшіңе сенімді бол. Ешнәрсеге қарамай, алға қойған мақсатыңа жет. Алған бетіңнен қайтпа! 

Әйел бақыты

Қате: Әр әйел әртүрлі және әркімнің бақыты әртүрлі. Біреу компания директоры болғысы келеді. Ал енді біреуі аяулы жар, ардақты ана атанғысы келеді. Бұның барлығы жақсы. Бірақ толыққанды емес. 

Дұрыс: Бақыт жайында көзқарасыңды қалыптастыр, соған ұмытыл. Қандай жағдай болса да бақытты бол!

Лайықты жігіт табу 

Қате: Лайықты жігіт табуды тілеу дұрыс емес. Себебі барлығы қарым-қатынас құруды, лайықты адамын жолықтыруды мақсат тұтпайды. 

Дұрыс: Бірінші кезекте өзіңді жақсы көр және құрметте. Өзге адамдармен сыйлы, үйлесімді қарым-қатынас жаса. 

Коллективтің гүлі болу

Қате: Әйелдер офистің безендіруі емес. Олар өзіне тиесілі, лайықты жалақы алуға, өзгелер сияқты құрметке ие болуға құқылы қызметкерлер. Айта кететін бір жайт, қазақстандық әйелдердің жалақысы ер адамдармен салыстырғанда 34% - ға аз. 

Әріптесіңді офистің гүлі деп атау, оның қызметі мен еңбегін бағаламау, төмендету. Олай жасаудың қажеті жоқ. 

Дұрыс: Қызықты жобалармен айналыс, өз-өзіңді дамыт, мансапта алға қарай жылжы. Өзіңе қызық дүниемен айналысудан қорықпа. Жаңа қызметтік мансаптарды бағындыр. 

Отбасы – ошақ қасының ұйытқысы бол

Қате: Үй жұмысының басым көпшілігін онсызда әйелдер істейді. Қазақстандық әйелдер үй жұмысына күніне орташа есеппен – 4 сағат 14 минут уақыт жұмсайды. Ал еркектер – 1 сағат 28 минут жұмсайды. 

Негізінде үй жұмысын жасау әйелдердің міндеті емес. Оны отбасы мүшелерінің барлығы істей алады және жасауы тиіс. 

Дұрыс: Үй жұмысын өзара дұрыс бөлу және істеу. 

Шынайы, нағыз әйел болу

Қате: Әйелдер әртүрлі және олардың барлығы шынайы. Әрқайсысы өзінше ерекше, әдемі, бағалы. Нағыз әйел болудың формуласы жоқ. Біреудің қиялындағы адам болуы ешкім міндетті емес. 

Дұрыс: Қалай барсың, солай бол. Өзіңді осы қалпыңда қабылда және жақсы көр.