Жапониядағы шетелдіктердің рекордтық өсімі

Бұл өзгеріс Жапонияның иммиграциялық саясатына енгізіліп жатқан бірқатар жаңалықтың бір бөлігі. Премьер-министр Санаэ Такаитидің үкіметі елде саны жылдам өсіп келе жатқан шетелдіктерді реттеуге бағытталған шараларды қолға алып отыр.

Шілдеде Жапония шетел азаматтарының барлығына берілетін визалар үшін алынатын алымды бес есеге арттырған еді. Бұл – соңғы 50 жылдағы алғашқы мұндай өсім. Билік алымның көтерілуін «инфляция мен валюта бағамының өзгеруін ескеру қажеттігімен» түсіндірді.

Жапонияда көші-қон мәселесі әлі де саяси тұрғыдан сезімтал тақырып саналады және бұл сала қатаң шектеулермен реттеледі. Алайда халқы қартайып келе жатқан ел еңбек күшінің тапшылығын өтеу үшін шетелдік жұмысшыларға барған сайын көбірек сүйеніп отыр.

2025 жылдың соңына қарай Жапонияда тұратын шетел азаматтарының саны 4,12 миллионнан асты. Бұл алдыңғы жылмен салыстырғанда 9,5 пайызға көп және рекордтық өсім болып отыр.

Тұру мерзіміне қарай алым өзгереді

Алым мөлшері көтерілгенге дейін Жапонияда тұрақты тұру мәртебесі жоқ шетелдіктер елдегі тұру мәртебесін өзгерту немесе болу мерзімін ұзарту үшін өтініш бергенде 6 мың иен (шамамен $38) төлейтін.

1 қазаннан бастап алым мөлшері адамның елде қанша уақыт тұруды жоспарлағанына қарай белгіленеді. Үш айға дейінгі мерзім үшін 10 мың иен ($63) төленсе, бес жыл немесе одан да ұзақ мерзімге 75 мың иенге (шамамен $474) дейін жетеді.

Қаржылық қиындыққа тап болған азаматтар мен босқын мәртебесі бар адамдарға жеңілдік қарастырылған.

Тұрақты тұру үшін табыс пен зейнетақы да ескеріледі

Енді тұрақты тұру мәртебесіне үміткерлердің тұрақты табысы Жапониядағы орташа көрсеткіштен төмен болмауы тиіс.

Шілдеде жарияланған соңғы мәліметке сәйкес, 2024 жылы жапондық үй шаруашылықтарының орташа жылдық табысы 5,75 миллион иен болған.

Ал келесі жылдың сәуірінен бастап тұрақты тұруға өтініш беретіндерге қойылатын талаптар одан әрі күшейеді. Соның ішінде жапон тілін ең төменгі деңгейде білу талабы енгізіледі.

Жергілікті бұқаралық ақпарат құралдарының хабарлауынша, осы өзгеріс жапон тілін үйрететін мектептерге жазылып, жапон тілін меңгеру деңгейін анықтайтын JLPT емтиханына тіркелгісі келетіндердің күрт көбеюіне себеп болған.

Бұдан бөлек, өтініш берушінің болашақта алатын зейнетақысының мөлшері кемінде 30 жыл бойы жалдамалы қызметкерлерге арналған зейнетақы сақтандыру жүйесіне қатысқан адамға тиесілі төлеммен шамалас болуы керек.

Егер есептелген болашақ зейнетақы белгіленген деңгейге жетпесе, өтініш берушінің қолындағы қаржылық активтерінің құны да есепке алынуы мүмкін.