Алматы полициясы видеоны 19 және 21 жастағы екі қыздың автокөлік базары аумағында түсіргенін анықтаған. Құқық қорғау органдары әлеуметтік желі мен тікелей эфир арқылы жасалған әрекеттер қоғамдық тәртіпті бұзғаны үшін жауапкершіліктен босатпайтынын атап өтті.

 «Бұл жағдайда құқыққа қайшы әрекет видеоға түсірілген. Қыздардың кім екені анықталып, іс материалдары сотқа жолданды. Әкімшілік жаза тағайындау туралы шешімді сот қабылдады», – деді Алматы қаласы Полиция департаменті Қоғамдық қауіпсіздік басқармасының бастығы Тимур Ногайбаев.

 Алматы полициясы әлеуметтік желілерде қоғамдық тәртіпті бұзғаны үшін де жауапкершілік қарастырылғанын еске салды.

Желідегі балағат үшін жаза

Қазақстанда әлеуметтік желіде балағат сөз жазу немесе айту мән-жайына қарай әкімшілік те, қылмыстық та жауапкершілікке әкелуі мүмкін.

Негізгі жағдайлар:

Қоғамдық тәртіпті бұзатын балағат сөз ұсақ бұзақылық ретінде қаралуы мүмкін. ӘҚБтК-нің 434-бабы қоғамдық орындарда былапыт сөйлеуді және айналадағыларға құрметсіздік танытып, қоғамдық тәртіп пен тыныштықты бұзатын өзге әрекеттерді қамтиды. Жаза – 20 АЕК айыппұл немесе 5-тен 15 тәулікке дейін әкімшілік қамау.

Ал әлеуметтік желідегі жазба нақты адамды қорлауға бағытталса, Қылмыстық кодекстің 131-бабы («Қорлау») қолданылуы мүмкін. Егер қорлау жария түрде, масс-медиа, телекоммуникация желілері немесе онлайн-платформалар арқылы жасалса, жаза 200 АЕК-ке дейінгі айыппұл, сол мөлшерде түзеу жұмыстары немесе 180 сағатқа дейін қоғамдық жұмыстар болуы мүмкін.

Егер әлеуметтік желіде біреудің ар-намысы мен беделіне нұқсан келтіретін көрінеу жалған ақпарат таратылса, бұл жала жабу ретінде бағалануы мүмкін. ӘҚБтК-нің 73-3-бабында жария түрде немесе телекоммуникация желілері арқылы жасалған жала үшін жеке тұлғаға 180 АЕК айыппұл немесе 20 тәулікке дейін әкімшілік қамау көзделген.