Желіде жарияланған суретте Рахмонов қатаң үлгідегі костюм киіп, ерекше образда түскен. Спортшы бұл жазбасының астарында не жатқанын ашып айтпаған. Алайда суретке қысқа әрі жұмбақ жазба қалдырған:

«Қарастырып жатырсыңдар ма?»

Рахмонов Махачевке қарсы тұра ала ма?

Рахмоновтың жаңа образы оның UFC-дегі болашағына қатысты болжамдар айтылып жатқан тұста жарияланды. Украиналық UFC жауынгері Даниил Донченко жартылай орта салмақтағы UFC чемпионы Ислам Махачевке қарсы тұра алатын спортшылардың қатарында Шавкат Рахмонов пен өз отандасы Ярослав Амосовты атады.

Донченконың пікірінше, Амосов стилі жағынан Махачевке қолайсыз қарсылас бола алады. Ол украиналық спортшының соққы техникасы жақсы екенін, бойының ұзын әрі қозғалысының ширақ екенін атап өткен. Ал Рахмоновқа қатысты Донченко оның ұзақ үзіліске шықпай тұрған кезіндегі деңгейін жоғары бағалаған.

«Махачевке стилі жағынан қиындық тудыра алатын қарсылас – Амосов. Ол бірінші орында. Махачевке нағыз криптонит болатын жауынгер, өйткені ол тек күрестен қорғанып қана қоймай, өзі де күресті таңады. Оның соққы техникасы жақсы, бойы ұзын, қозғалысы ширақ әрі соққыны көбірек жасайды. Сондықтан бірінші орынға Ярославты қояр едім. Екінші орында – Шавкат Рахмонов. Бірақ оның жарақаттардан кейін октагонға қандай күйде оралатынын білмеймін. Егер екі жыл бұрынғы Шавкатты алсақ, ол да Исламды жеңе алар еді», – деді Даниил Донченко Vringe.com сайтына берген сұхбатында.

Шавкат Рахмонов соңғы жекпе-жегін 2024 жылғы 7 желтоқсанда өткізді. UFC 310 турнирінде ол ирландиялық Иэн Мачадо Гэрриді бес раундтың қорытындысы бойынша төрешілердің бірауызды шешімімен жеңді. Осы жеңістен кейін қазақстандық спортшының кәсіби рекорды 19-0-ге жетті.

Содан бері Рахмонов тізесіндегі жарақатына байланысты октагонға шыққан жоқ. 2026 жылы ол тағы бір тізе операциясын өткеріп, оңалту кезеңін жалғастырып жатыр. Қыркүйек айындағы соңғы ақпарат бойынша, оның UFC-дегі оралуы 2027 жылға дейін күтілмейді.

Шавкат Рахмонов кім?

Шавкат Рахмонов – Қазақстанның UFC-дегі ең танымал жауынгерлерінің бірі. Ол жартылай орта салмақта өнер көрсетеді және кәсіби мансабында әлі жеңіліп көрмеген.

«Номад» лақап атымен танылған спортшы UFC-дегі алғашқы жекпе-жегін 2020 жылы өткізіп, ұйымдағы барлық алты кездесуінде жеңіске жетті. Оның UFC-дегі жеңістерінің арасында Нил Мэгни, Джефф Нил, Стивен Томпсон және Иэн Мачадо Гэрри секілді танымал қарсыластар бар.

Рахмоновтың кәсіби рекорды – 19 жеңіс, 0 жеңіліс. Оның 8 жеңісі нокаутпен немесе техникалық нокаутпен, 10 жеңісі сабмишн арқылы аяқталған. Тағы бір жекпе-жекте төрешілер шешімімен жеңіске жеткен. Осылайша, ол 19 жеңісінің 18-ін мерзімінен бұрын тіркеген.

Рахмонов 2024 жылғы жеңісінен кейін UFC жартылай орта салмағындағы басты үміткерлердің бірі саналды. Алайда ұзақ уақыт бойы жекпе-жек өткізбегеніне байланысты 2026 жылдың ақпанында UFC рейтингінен шығарылды. Қазір ол жарақатынан айығып, октагонға оралуға дайындалып жатыр.

Ал Ислам Махачев 2025 жылы жартылай орта салмақтағы UFC чемпиондық белбеуін жеңіп алып, 2026 жылғы тамызда Иэн Мачадо Гэрриді жеңу арқылы титулын қорғады. Қазіргі таңда оның кәсіби рекорды – 29 жеңіс, 1 жеңіліс, ал UFC-дегі қатарынан жеңген жекпе-жектер саны – 17.

Фото: Instagram/shavkatrakhmonov94