Бұл туралы Сассекс герцогы GQ журналына берген сұхбатында айтты.

 «Әлемде болып жатқан оқиғаларды ескерсек, ең маңыздысы – татуласу», – деді ол.

Гарридің туыстарымен арасы 2020 жылы әйелі Меган екеуі корольдік міндеттерінен бас тартып, Калифорнияға қоныс аударғаннан кейін суыған. Кейін ерлі-зайыптылар король әулетін ашық сынай бастады.

 Ханзада әкесімен және ағасымен арадағы күрделі қарым-қатынас жанына бататынын мойындады. Оның айтуынша, мұндай жағдай көп адамға таныс. Сондықтан өз отбасындағы оқиға жұрттың назарын аударып отыр.

 «Ағайындылардың арасында келіспеушілік болады, ата-ана мен бала, сондай-ақ бала мен ата-анасының бірінің арасындағы қарым-қатынас та бұзылуы мүмкін», – деді ол.

Гарри арадағы байланысты қалпына келтіруге талпыныс жасау басқа отбасыларға да өзара түсініспеушілікті еңсеруге көмектеседі деп санайды.

 «Біздің татуласқанымызды қаламайтындар бар. Ал мен арамыздың қайта түзелгенін қалаймын», – деп қосты ол.

 Сассекс герцогы «жараның ізі мәңгі қалса да», өткенді артқа тастауға шақыратынын атап өтті.