Мәселенің мән-жайы

Автомектепті аяқтағандар теориялық және практикалық емтихандар тапсыру үшін кезекті 2 айға дейін күтуге мәжбүр. Олар өз шағымдарын КТК арнасы арқылы жеткізді.

Тұрғындардың сөзінше, тіпті кезек алып қойып, уақытында келгеннің өзінде жүйедегі ақауларға байланысты кезек жетпей қалатын сәттер жиілейді. Салдарынан курсанттар арасында психологиялық жүктеме көбейіп, емтиханды сәтті тапсыру мүмкіндігі төмендейді.

Қалыптасқан жағдай автомектеп өкілдерін де тығырыққа тіреді. Мамандардың айтуынша, биылдан бастап жүргізуші куәлігін алу процесі едәуір күрделене түскен. Курсанттар екі айлық оқу курсын толық аяқтағанымен, мамандандырылған ХҚКО қосымшасындағы орындар үнемі жабық тұратын көрінеді. Осының салдарынан оқу орындарының жетекшілері де курсанттармен бірге күнделікті бос орын іздеуге мәжбүр болып отыр. Әбден созылып кеткен бұл кезеңнің кесірінен түлектердің 20% жуығы мүлдем рульге отырудан және куәлік алу ойынан бас тартуда.

 «Оқу процесі 2 айда ойдағыдай өтеді. Алайда ХҚКО арқылы емтиханға тіркелу мүмкін емес, бронь жүйесі үнемі бұғаттаулы тұрады», – дейді автомектеп басшысы Валентина Алиева.

 Емтихан тапсырушылар саны 2 есе артқан

«Азаматтарға арналған үкімет» мемлекеттік корпорациясы өкілдері мәселенің бар екенін растап, оның негізгі себептерін түсіндірді. Менеджер Нұрсұлтан Шанқаровтың айтуынша, соңғы бір жылда емтихан тапсырушылар саны 2 есе артқан.

Автодромдардағы кезектің туындауы мен ақаулардың жиілеуіне бірнеше басты себеп әсер етіп отыр. Ең алдымен, емтихан тапсырушылар ағынының күрт көбеюі мен маусымдық сұраныстың артқаны байқалады. Бұдан бөлек, практикалық симуляция кезінде автокөліктердің жиі жол-көлік оқиғаларына ұшырап, істен шығуы да кедергі келтіруде. Сондай-ақ қайта тапсырушылар санының тым көп болуы мен автодромдардың шектеулі өткізу мүмкіндігі жағдайды одан әрі күрделендіріп отыр.

Мекеме өкілдері кезекті азайту мақсатында теориялық емтихан тапсыратын қосымша кабинеттер жабдықталғанын хабарлады.

Ал елордалық мамандар мен сарапшылар бұл тығырықтан шығу үшін алматылықтарға емтиханды елдің өзге қалаларына барып тапсыруға кеңес береді. Тіпті кейбір тұрғындар куәлікке қол жеткізу үшін басқа өңірлерден бірнеше күнге баспана жалдап жатқан көрінеді.