«Мемлекеттік тіл – ұлтты ұйыстыратын фактор»

Президенттің айтуынша, бүгінде қазақ тілінде бір ауыз сөз айта алмау білімсіздіктің белгісіне айналды.

 «Бұрын болжаммен, долбармен ғана айтылатын жағдай қазір шындыққа айналды.   Қазақ тілі қандай да бір әкімшілік, тіпті саяси мәжбүрлеусіз өрісі кеңейіп, көпшіліктің тіліне айналды. Әсіресе, жастарымыздың қазақ тілінде еркін, сауатты сөйлейтіні қуантады», – деді ол.

 

Бұл басқа тілдерден бас тарту дегенді білдірмейді…

Сонымен қатар Тоқаев қазақ тілінің мемлекеттік тіл ретіндегі қолданысының кеңеюі басқа тілдерден бас тарту дегенді білдірмейтінін айтты.

 «Алайда бұл басқа тілдерден бас тарту керек дегенді білдірмейді, әрі оларды шеттетуге құқық бермейді», – деді ол.

 Президент Конституцияда азаматтарды тіліне, тегіне, ұлтына, діни көзқарасына немесе өзге де себептерге байланысты кемсітуге тыйым салынғанын еске салды.

Тоқаевтың айтуынша, мемлекеттік тілдің дамуы толеранттық пен сенімге негізделген ортақ жұмыстың нәтижесі.

Әлеуметтік желідегі арандатушылар туралы

Мемлекет басшысы әлеуметтік желіде ұлтараздықты қоздырып, арандатушылық әрекетке баратындарға да тоқталды.

 «Соған қарамастан ара-тұра кейбір тісқаққан арандатушылар әлеуметтік желіде ұлтараздықты қоздырып, әдейі отқа май құяды», – деді Тоқаев.

 Президент мұндай әрекеттердің қоғамға және ел бірлігіне қауіп төндіретінін айтты.

 «Олардың көздегені біреу – қоғамды әлсіретіп, Қазақстанның Егемендігіне нұқсан келтіру, елді бірліктен айырып, бейбіт, алаңсыз өміріміздің астаң-кестеңін шығару», – деді ол.

 Тоқаев мұндай әрекеттер балалар мен немерелердің болашағына да кері әсер ететінін атап өтті. Мұндай жағдайларға құқық қорғау органдары ғана емес, бүкіл қоғам табанды түрде қарсы тұруы керек екенін де атап өтті.

 «Сондықтан құқық қорғау органдары мен тұтас қоғам бұған табанды түрде қарсы тұруы керек. Конституцияда бекітілген «Заң мен тәртіп» қағидатына сай әрекет етуіміз қажет», – деді Қасым-Жомарт Тоқаев.