Дональд Трамп Қытай төрағасы Си Цзиньпинді Вашингтон маңындағы Эндрюс әскери-әуе базасында өзі қарсы алып, АҚШ президенттері 60 жылдан астам уақыт бойы ұстанып келген дипломатиялық хаттаманы бұзды.

Сиді қарсы алу рәсімі

Қытай басшысын қарсы алу рәсіміне алты F-16 және алты F-22 жойғыш ұшағы қойылды.

Си Цзиньпин 23 қыркүйекте АҚШ-қа мемлекеттік сапармен келді. Қытай басшысының елге келу рәсімін Ақ үй тікелей эфирде көрсетті.

Ақ үйдің баспасөз пулі X әлеуметтік желісінде хабарлағандай, Си Цзиньпин мінген ұшақ Вашингтон маңындағы Эндрюс бірлескен әскери базасына жергілікті уақыт бойынша 17:39-да қонды. Ұшақ трапына дейін қызыл кілем төселіп, оның екі жағына салтанатты киімдегі америкалық әскери қызметшілер сап түзеді.

Әуе алаңына бұдан бөлек алты F-16 және алты F-22 жойғыш ұшағы орналастырылды. Ұшақтан түскен Си Цзиньпин Трамппен бірге қызыл кілем үстімен жүріп өтті. Екі елдің тулары қойылған жерде қос көшбасшы тоқтады. Осы кезде АҚШ Әскери-әуе күштерінің оркестрі Қытайдың мемлекеттік әнұранын орындап, артиллериялық салют атылды.

Салтанатты рәсім кезінде олардың үстінен B-1 үлгісіндегі екі бомбалаушы ұшып өтті. Рәсім аяқталған соң Трамп Си Цзиньпин көлікке отырғанша күтіп, содан кейін өзі президенттік «Зверь» лимузиніне мінді. Екі көшбасшы осы көлікпен Marine One тікұшағына қарай бет алды.

60 жылдан бері қайталанбаған қадам

Трамптың Си Цзиньпинді ұшақтан түскен бойда өзі қарсы алуы АҚШ-та алпыс жылдан астам уақыт бойы қалыптасқан дипломатиялық дәстүрден ауытқу саналады.

Әдетте АҚШ президенті шетелдік мемлекет басшыларын әскери базаға ұшып келген сәтінде өзі қарсы алмайды. Мұндай жағдайдың соңғысы 1962 жылы болған. Сол кезде АҚШ президенті Джон Кеннеди Ұлыбритания премьер-министрі Гарольд Макмилланды әскери базадағы ұшу-қону жолағында қарсы алған.

Financial Times басылымы атап өткендей, мұндай деңгейдегі қарсы алу Трамптың Қытай көшбасшысына айрықша құрмет көрсеткісі келгенін аңғартуы мүмкін. Ал Си Цзиньпин мамыр айында АҚШ президенті Қытайға барған кезде Трампты әуежайдан қарсы алмаған.

Си Цзиньпин АҚШ-та 23-25 қыркүйек аралығында болады. Бұл – Қытай басшысының соңғы он жылдан астам уақыт ішіндегі АҚШ-қа жасаған алғашқы мемлекеттік сапары.

The Wall Street Journal-дың жазуынша, Бейжің Қытай басшысын қарсы алу рәсімі Трамптың Қытайға барған кезінде ұйымдастырылған шаралардың ауқымына сай болғанын қалаған. Нәтижесінде сапар бағдарламасына Ақ үй алдындағы ресми қарсы алу рәсімі, әскери құрмет көрсету, 21 зеңбіректен салют беру және мемлекеттік кешкі ас енгізілді.

Трамп пен Си не талқылайды

Трамп пен Си Цзиньпиннің негізгі келіссөздері 24 қыркүйекке жоспарланған.

Кездесуде тараптар тарифтер бойынша уақытша бітімді ұзарту, сауда қатынастары, аса маңызды минералдарды жеткізу және жасанды интеллектіні қолдану мәселелерін талқыламақ.

Трамп бұдан бөлек Симен Иран төңірегіндегі ахуалды сөз етуді көздеп отыр. Ал Қытай басшысы Тайвань мәселесін және АҚШ-тың аралға қару-жарақ жеткізуін талқыламақ.

фото: nypost.com