Жұмыс ұсынушылар азайды

Energyprom сарапшыларының дерегінше, 2026 жылдың екінші тоқсанының соңында кәсіпорындарда шамамен 56 600 бос жұмыс орны болған. Бұл өткен жылмен салыстырғанда 9,2%-ға аз.

Дегенмен былтыр бұл көрсеткіш ең жоғары деңгейге жетіп, 61 900 бос жұмыс орны тіркелген. Ал оған дейінгі төрт жылда бос жұмыс орындарының саны 51–54 мың шамасында болған.

Hh.kz деректері де осы үрдісті растайды. Екінші тоқсанда порталға 118 мыңнан астам бос жұмыс орны жарияланған. Бұл 2025 жылдың осы кезеңімен салыстырғанда 8,5%-ға аз.

Қай өңірлерде жұмыс көп?

Бос жұмыс орындарының ең көбі Алматыда – шамамен 13 мың. Астанада бұл көрсеткіш екі есе аз, яғни 6 800 орын.

Қарағанды және Павлодар облыстарының әрқайсысында шамамен 4 мың бос жұмыс орны бар. Ең төмен көрсеткіш Қызылорда облысында – 348, ал Жетісу облысында – 840 бос жұмыс орны.

Сонымен бірге жекелеген өңірлерде бос жұмыс орындарының саны артқан. Ұлытау облысында олардың саны бірден 58,2%-ға, Алматы облысында 38,1%-ға, Түркістан облысында 23,2%-ға көбейген. Ал Шымкентте бос жұмыс орындарының саны 55,8%-ға, Атырау облысында 36,1%-ға күрт азайған.

Қай салаларда жұмыс орындары қысқарды?

Бос жұмыс орындарының саны бойынша өнеркәсіп саласы көш бастап тұр – 16 100 орын. Алайда дәл осы салада ең елеулі қысқару байқалған: бос жұмыс орындарының саны 2 300-ге азайған.

Бұл негізінен өңдеу өнеркәсібіне тиесілі. Аталған саладағы бос орындар саны 10 мыңнан 8 300-ге дейін төмендеген. Мемлекеттік секторда 10 мың, логистика саласында 6 400, саудада 5 200, медицина саласында 4 400 бос жұмыс орны бар.

Жылжымайтын мүлікпен жасалатын операциялар саласында бос жұмыс орындарының саны ең көп қысқарған – 52,1%. Қаржы және сақтандыру салаларында бұл көрсеткіш 27,1%-ға, әкімшілік қызмет көрсету саласында 29,1%-ға төмендеген. Ал ойын-сауық және демалыс саласында бос жұмыс орындарының саны 40,3%-ға, ауыл шаруашылығында 26,2%-ға, қонақүй және мейрамхана бизнесінде 17,2%-ға артқан.

Бәсеке күшейді

Бос жұмыс орындарының саны азайғанымен, жұмыс іздеушілер көбейген. Барлық кәсіби санат бойынша түйіндеме саны артқан. Ең жоғары өсім IT және әкімшілік секторда байқалды – 15,3%. 

Бұл еңбек нарығындағы бәсекенің күрт күшеюіне әкелген. Стратегия және консалтинг саласында бір бос жұмыс орнына 30 адам таласады. IT саласында бір орынға 24 үміткерден келеді. Бір жыл бұрын бұл көрсеткіш 12 адам болған.

Құрылыс саласында бәсеке индексі 7,5-тен 18,5-ке дейін, сауда саласында 7-ден 13,8-ге дейін өскен.