Жаңа басшы кім?

Vogue басылымының жазуынша, Дарио Витале Emporio Armani бренді мен Giorgio Armani-дің аксессуарлар бағытына креативті директор болып тағайындалды.

Armani сән үйі тарихында алғаш рет креативті директор қызметіне әулетке немесе компанияға қатысы жоқ маманды шақырды. Жаңа креативті директор – италиялық дизайнер Дарио Витале. Ол Emporio Armani брендіне, сондай-ақ Giorgio Armani-дің аксессуарлар бағытына жауап береді, деп хабарлайды Liter.kz Vogue.com-ға сілтеме жасап.

Бұл – сән үйінің негізін қалаушы Джорджо Армани 2025 жылдың қыркүйегінде қайтыс болғаннан кейінгі компаниядағы алғашқы сырттан жасалған тағайындау. Бұған дейін дизайн бағытын кутюрьенің жиені Сильвана Армани мен оның ұзақ жылдар бойы бірге жұмыс істеген серіктесі Лео Делль’Орко басқарған.

 «Emporio Armani мен Giorgio Armani-дегі осы қос міндетті атқару мен үшін үлкен мәртебе. Брендтің ондаған жыл бойы сән тарихын қалыптастырған бай мұрасы мен өзіндік танымал дизайн тілі бар», – деді Дарио Витале жаңа қызметіне қатысты пікір білдіріп.

 Мұрагерлер не дейді?

Кутюрьенің мұрагерлері Сильвана Армани мен Лео Делль’Орко да бұл таңдауды қолдады.

«Emporio еркіндік пен экспериментке арналған кеңістік ретінде құрылған. Дарио осы дәстүрді рухты құрметпен әрі шынайы түрде жалғастыратынына сенімдіміз», – деді олар.

Дарио Витале – әлемдік сән индустриясында танымал дизайнер. Ол бұған дейін Miu Miu сән үйінде Миучча Прадамен бірге 14 жыл жұмыс істеген. Ал 2025 жылы Versace-ні сырттан келген алғашқы дизайнер ретінде басқарды. Кейін Prada Group Versace-ні сатып алған соң, Витале бұл брендтен кетті.

Енді 43 жастағы дизайнерге италиялық сән алыбының жастарға арналған бағытын жаңаша дамыту міндеті жүктеліп отыр. Ал Giorgio Armani-дің негізгі желісін Сильвана Армани мен Лео Делль’Орко басқара береді.