Қырғызстан президенті Садыр Жапаров елдегі жыныстық қол сұғылмаушылыққа қарсы қылмыстар үшін жазаны қатаңдататын заңға қол қойды. Енді қылмыстық істер тараптар татуласса да тоқтамайды. 

– Тараптардың татуласуына байланысты ауыр қылмыстар (оның ішінде зорлау) бойынша қылмыстық істер тоқтатылмайды. Тараптардың татуласуына байланысты қылмыстық істі тоқтатуды көздейтін нормалар алынып тасталады, – делінген Қырғызстан президентінің ресми сайтында жарияланған ақпаратта. 

Сондай-ақ, Қырғызстанда жыныстық қол сұғылмаушылық туралы заңнан пробациялық бақылаумен немесе кепілмен шығу, қылмыстың ескіру мерзімі сияқты бөліктер алынып тасталды. 

Заң жарияланғаннан кейін 10 күннен соң күшіне енеді.