Лукизм

Ағылшын тілінің look (түр, келбет) дегенінен шыққан.

Лукизм — адамды сырт келбетіне қарап алалау, келеке қылу, тіл тигізу. Мұндай дискриминацияға көбіне қоғам ойлап тапқан сұлулық стандарттарына сай келмейтін адамдар ұшырайды.

Термин алғаш рет ХХ ғасырдың 70-ші жылдарында толық адамдар құқығын қорғайтын қозғалыс аясында пайда болған.

Сұлулық деген салыстырмалы ұғым болғанына, уақыт өте келе өзгеріп отыратына қарамастан көпшілік жұрттың ішкі жан дүниесі не қабілетіне емес, бет-әлпетіне қарайды, мінеп-сынайды, тіпті тіл тигізіп жатады.

Лукизм қоғамымызда кеңінен таралған: жұмыста да, мектепте де, университетте де, көшеде де — мұндай кемсітуге кез келген жерде ұшырауға болады.

Бірақ соған, мұндай тендециясының адам өміріне үлкен ықпал ететіне қарамастан лукизмге онша көп назар аударылмайды.

Лукизмге қарсы бодипозитив деген қозғалыс бар. Бодипозитив — салмағы, түрі, қандай да бір физикалық ерекшелігіне бола өз-өзінен жиіркенбеу, ұялмауға, басқаларды сырт келбетіне қарап алаламауға үндейтін қозғалыс.