Sports.kz сайтының жазуынша, бұл көрсеткіш — Рыбакинаның мансабындағы ең жоғары нәтиже. Бұл нәтиже теннисші АҚШ-та өтіп жатқан Indian Wells турнирінің жартылай финалына шыққаннан кейін тіркелді.

Ширек финалдағы жеңіс

Рыбакина ширек финалда әлемнің 5-ракеткасы, америкалық Джессика Пегулаға қарсы келді.

Бұл теннисшілердің өзара сегізінші кездесуі еді. Осыған дейін 7 матчтың төртеуінде Рыбакина жеңді.

Бірінші партияда Елена айқын басымдылық танытты – 6:1. Екінші сетте Пегула 4:2 есебімен алға кеткенімен, Рыбакина таразы басын теңестіре алды – 4:4. Ақыры тай-брейкте мерейі үстем болды – 7:6 (7:4).

Бір сағат 28 минутқа созылған бәсекеде Рыбакина 7 эйспен бірге 4 брейк-пойнттың үшеуін өз есебіне жазды. Пегула 5 эйс, бір брейкпен (5 брейк-пойнт) көзге түсті.

Жартылай финал 

Елена Рыбакина финалға шығу үшін әлемнің 9-ракеткасы, украиналық Элина Свитолинамен таласады. Ол ширек финалда әлемнің 2-ракеткасы, Польша өкілі Ига Швентекті қапы қалдырды – 6:2, 4:6, 6:4.

Қазіргі live-рейтинг бойынша Рыбакинаның еншісінде 7523 ұпай бар және ол екінші орында тұр. Ал рейтинг көшін 10415 ұпай жинаған беларусьтік теннисші Арина Соболенко бастап келеді.

Фото: Robert Prange/Getty Images